Heimir Karls

Hvers vegna látum við bjóða okkur allt?

Mon, 12 Feb 2007 09:35:13 GMT

Í bítinu á Bylgjunni á morgun, um kl. 7:45, ætlum við að velta því fyrir okkur, hvers vegna við Íslendingar erum svona lélegir mótmælendur.

Ég held að það sé nokkuð ljóst að þjóðinni finnst að svindlað eða okrað sé á sér á langflestum sviðum. Flestir nefna vexti og verðtryggingu, matarverð, bensíverð, verð á fatnaði o.s.fr.v En hvers vegna látum við bjóða okkur þetta? Afhverju tökum við ekki höndum saman?

Þá má einnig spyrja sig þeirrar spurningar, hvers vegna við látum bjóða okkur það, að embættismenn, ráðherrar og stjórnmálamenn, beri ekki raunverulega ábyrgð með afsögnum eins og tíðkast erlendis, eftir afglöp í starfi? Er við almenning að sakast, setur hann ekki nægilegan þrýsting á þá eða/og er við fjölmiðla að sakast?

Hvað finnst þér? Hvers vegna látum við ganga yfir okkur svo auðveldlega, eða gerum við bara alls ekki?

Kveðja
Heimir Karls

Léttvín í matvörubúðir?

Mon, 05 Feb 2007 10:13:51 GMT

Guðlaugur Þór Þórðarson, þingmaður Sjálfstæðisflokksins, hefur lagt fram frumvarp á Alþingi um að einkasala ríkisins á léttvíni og bjór verði afnumin og leyft verði að selja léttvín og bjór í matvöruverslunum.

Þingmaðurinn var í viðtali hjá okkur Sirrý í morgun - hlustaðu á Bylgjan .is
Það er klárt að skiptar skoðanir eru um þetta mál eins og koma fram hjá hlustendum sem hringdu inn í morgun.

Er þaðekki bara gamaldags að selja áfengi í sérstökum ríkisreknum verslunum? Eða er það etv. bara skynsamlegt að vera ekki að elta markaðshyggjuna og körfu neytenda um þægindi? Hvað finnst þér?

Kveðja
Heimir Karls

Ættu læknar að fá að auglýsa?

Wed, 31 Jan 2007 10:54:36 GMT

Heilbrigðisstéttum, læknum og stofnunum, er óheimilt að auglýsa starfsemi sína. "Þannig er komið í veg fyrir að almenningur geti fengið nauðsynlegar upplýsingar um heilbrigðisþjónustu. Sjúklingar verða því að treysta á umtal, ímynd og orðróm þegar þeir velja sér heilbrigðisþjónustu.",segir í tilkynningu frá Ágúsi Ólafi Ágústssyni, varaformanni Samfylkingarinnar. Ágúst Ólafur er flutningsmaður tillögu á Alþingi þess efnis að heimila auglýsingar lækna og heilbrigðisstofnana.

Hann vill jafnframt meina að "almenningur eigi oft fjölbreytilega valkosti milli lækna og heilbrigðisstofnana sem keppa um þjónustu og aðstöðu fyrir almenning þrátt fyrir að í flestum tilvikum sé hið opinbera sem greiðir fyrir þjónustuna." Svo víkur hann að tannlæknum og segir; "Enn ríkari ástæður eru fyrir því að afnema auglýsingabann hjá tannlæknum þar sem þeir hafa frjálsa gjaldskrá."

Ágúst færir rök fyrir málin sínu á eftirfarandi hátt:
"Á sínum tíma var auglýsingabann talið nauðsynlegt vegna fámennis í landinu og kunningsskapar og talið halda uppi aga innan stéttarinnar. Flutningsmaður telur að þessi rök eigi ekki við í dag, hafi þau einhvern tímann átt við. Núverandi auglýsingabann er sömuleiðis erfitt og flókið í framkvæmd og kemur í veg fyrir eðlilega nýliðun. Í nágrannaríkjum má finna mun frjálslegri lagasetningu hvað varðar auglýsingar heilbrigðisstétta og -stofnana en það sem gildir hérlendis.Flutningsmaður leggur ríka áherslu á að afnám auglýsingabanns lýtur einungis á að auka upplýsingaflæði til almennings en ekki að einhvers konar markaðsvæðingu heilbrigðisþjónustunnar."

Ég er ekki í nokkrum vafa að við Íslendingar höfum skoðun á þessu máli, en lítið hefur almenningur fengið að tjá sig um það hingað til. Þetta mál varðar okkur öll og við eigum að hafa skoðun á því.
Hvað finnst þér?

Kveðja
Heimir Karls

Líkamsræktarsalur fyrir börn!

Mon, 15 Jan 2007 10:09:22 GMT

Eins og sagt var frá í fréttum um helgina tók World Class í Laugum í notkun líkamsræktarkerfi fyrir börn og unglinga á aldrinum 8 til 14 ára. Þar með opnaði fyrsti sérhæfði líkamsræktarsalurinn fyrir börn á Íslandi.

Við Sirrý ræddum þetta aðeins í morgun ( sjá hér).

Finnst þér þetta svolítið skrítið? Er þörf á líkamsrækt fyrir börn? Ef svo er, er þá ekki eitthvað að annars staðar í samfélaginu? Þarf ekki að hvetja börnin enn meira til þess að leika sér úti og til þátttöku í íþróttum, eða ætti að fjölga leikfimitímum og auka líkamlega hreyfingu í skólunum?

Þarf ekki að gera samfélagið okkar enn barnvænna?

Hvað finnst þér?

Kveðja
Heimir Karls

Er verið að okra á okkur?

Tue, 09 Jan 2007 10:31:14 GMT

Það er rosalega súrt að þurfa að kyngja því að lækkun matarskattarins gufi bara upp í hækkun á heildsöluverði, sem skilar sér svo einfaldlega í hærra útsöluverði á matvörum í verslunum. "Verð á vörum og þjónustu sem nýtist til vanalegs heimilishalds er rúmlega 47% hærra á Íslandi en í þeim löndum þar sem evran er gjaldmiðill." Þetta kemur m.a. fram í fréttablaðinu í dag. Getum við látið bjóða okkur þetta lengur?

Við Sirrý, ásamt Gissuri Sigurðssyni, veltum vöngum í morgun yfir mögulegum ástæðum hás matarverðs á Íslandi ( sjá hér).

Í Íslandi í bítið í fyrramálið munum við halda áfram að ræða málið frekar og fáum í heimsókn til okkar Sigurð Jónsson framkvæmdastjóra Samtaka verslunar og þjónustu.

Hvað finnst þér? Hverjar telur þú ástæðurnar vera fyrir háu matarverði á Íslandi? Segðu álit þitt hér að neðan eða taktu þátt í könnuninni hér til hliðar.

Kveðja
Heimir Karls

Dauðarefsing eða ekki?

Fri, 05 Jan 2007 19:27:35 GMT

Ertu fylgjandi dauðarefsingum eða ekki? Ef svo er, hvernig rökstyður þú það?

Ef þú ert hins vegar ekki fylgjandi dauðarefsingu, má spyrja, hvers vegna ekki?

Af hverju má ekki dæma mann til dauða og taka hann af lífi, ef sýnt er með óyggjandi sönnunum að hann hefur sjálfur tekið saklaust líf, t.d. líf saklauss smábarns eftir hrottalegar misþyrmingar? Af hverju má ekki dæma mann til dauða sem hefur murkað lífið miskunnarlaust úr tugum þúsunda, hundruðum þúsunda eða jafnvel milljónum manna, sbr. Hitler eða Saddam Hussein? Hafa þeir þá ekki fyrirgert rétti sínum til að lifa sjálfir?

Eða - er alrangt að leyfa dauðarefsingar? Hvernig getum við, sem aldrei höfum framið slíkt ódæðisverk, leyft okkur að deyða mann "löglega"? Erum við þá einhverju betri en slíkir kaldrifjaðir morðingjar? Og hvað með þá fjölmörgu sem í gegnum tíðina hafa verið dæmdir saklausir til dauða og teknir af lífi og sekt þeirra síðar afsönnuð en of seint eða heyrir það sögunni til með nýjustu rannsóknartækni? Hefur dauðarefsing dregið úr morðum í þeim löndum þar sem hún er leyfð, t.d. Bandaríkjunum?

Ef öll ríki heims tækju upp dauðarefsingu frá og með morgundeginum hvernig heimur yrði það?

Er hægt að fara einhverja millileið? Er hægt að vera bæði með og á móti dauðarefsingum? T.d. að heimila dauðarefsingar í þeim tilfellum þegar um morð á börnum er að ræða eða fjöldamorð framin eða...?

Hvað finnst þér? Segðu álit þitt hér að neðan eða taktu þátt í könnuninni.

Kveðja
Heimir Karls.
PS Satt best að segja á ég svolítið erfitt með að gera upp hug minn í þessu máli.

Hvernig fannst þér Áramótaskaupið?

Mon, 01 Jan 2007 13:57:33 GMT

Gleðilegt nýtt ár!

Nú höfum við kvatt árið 2006 með rosalegri flugeldasýningu um allt land. Við höfum slegið met enn á ný í "flugeldauppskotum". 20% aukning á sölu á flugeldum frá því árinu áður hjá Landsbjörgu, sem sagt metár! Flugeldasýningin á gamlárskvöld bregst aldrei.

Langflest sitjum við spennt fyrir framan sjónvarpstækin á gamlárskvöld þegar Áramótaskaupið byrjar, í von um að sjá besta Skaupið frá upphafi. Og spurning kvöldsins og aðalspurningin fyrstu dagana á nýju ári er ávallt: Hvernig fannst þér Skaupið?

Svarið því hér að neðan eða takið þátt í könnuninni.

Ég þakka samveruna á liðnu ári og vona innilega að árið 2007 verði "metár" fyrir okkur Íslendinga í bestu merkingu þess orðs.

Latibær - góður eða slæmur?

Mon, 11 Dec 2006 09:57:21 GMT

Dagný Kristjánsdóttir skrifar í nýjasta Tímarit máls og menningar um Latabæ, þar sem hún gagnrýnir efni og innihald þáttanna harðlega undir yfirskriftinni Latibær er skyndibiti. Í kjölfarið svaraði Magnús Scheving með grein í einu dagblaðanna og svo aftur svaraði Dagný með þessari grein í Fréttablaðinu ( sjá hér) en þar segir hún m.a.:

"Mér finnst barnabækurnar hreint ekki góðar og rökstyð það. Mér finnst sjónvarpsþættirnir heldur ekki góðir og rökstyð það líka."

Við Sirrý ræddum einnig við Silju Aðalsteinsdóttur um latabæ í Íslandi í bítið í morgun þar sem hún sagði að í Latabæ kæmi jafnvel fram einelti ofan á annað ( sjá viðtalið hér). Endilega spilið viðtalið og segið ykkar álit hér á síðunni.

Á gagnrýnin við rök að styðjast eða er hún ósanngjörn?

Kær kveðja
Heimir Karls.

Ef þú mættir ráða!

Thu, 07 Dec 2006 10:09:36 GMT

Það er endilega ekki tekið út með sældinni að hafa ráðherravöld í lýðræðisþjóðfélagi eins og okkar. Almenningur gagnrýnir ráðherrana oft harkalega og skilur ekki afhverju þetta er lagað frekar en hitt, afhverju þessi ákvörðun var tekin frekar en hin, afhverju göng eru byggð þar, en ekki Suðurlandsvegur breikkaður hér osfrv.

Ég held að í hugum okkar einföldum við ákvarðanatökur ráðherra töluvert og tökum ekki með í reikninginn að á þá er þrýst úr mörgum áttum. En vissulega má til sanns vegar færa og taka dæmi um ákvarðanir ráðherra, þar sem þeir hafa gengið erinda kjördæma sinna og tekið þeirra hagsmuni og sett framar í áhersluröðina en sanngjarnt mætti teljast.

En ef þú mættir ráða? Ef þú hefðir völd? Ef þú mættir velja þér ráðherrastól og taka eina ákvörðun sem þú teldir að væri brýn, hver yrði hún? Væri hún hlutlaus og tækir þú hana án þess að taka mið af pressu í kringum þig, frá vinum, kunningjum eða samfélaginu sem þú býrð í? Kannski ósanngjarnt að setja málið upp svona en hvaða mál telur þú brýnast í samfélaginu?

Hvaða málefni væri það sem þú myndir vilja kippa í liðinn mættir þú ráða?

Taktu líka þátt í könnuninni hér til hliðar.
Hvaða ráðherrastól myndir þú velja þér annan en forsætis eða utanríkis?

Kær kveðja
Heimir Karls.

Bílprófsaldur í 18 ár?

Wed, 29 Nov 2006 13:15:00 GMT

Sitt sýnist hverjum um hvort hækka beri bílprófsaldurinn í 18 ár. Svo eru eflaust til þeir sem vilja hækka hann enn frekar.

Kolbrún Baldursdóttir, sálfræðingur, sem situr sem varamaður á þingi fyrir Geir H. Haarde, hefur lagt fram frumvarp um hækkun bílprófsaldurs í 18 ár, var gestur okkar í Íslandi í bítið í morgun, ásamt Ólafi Hrafni Steinarssyni, nemanda á fyrsta ári í MR. Þar ræddum við þessa hugsanlegu hækkun bílprófsaldursins - sjá hér!

En hvað finnst þér? Heldurðu að það auki umferðaröryggi almennt ef bílprófsaldurinn verði hækkaður í 18 ár. Eða viltu hækka hann enn frekar?

Segðu skoðun þína hér að neðan eða taktu þátt í könnuninni okkar.

Kveðja
Heimir Karls

Skutlan!

Tue, 28 Nov 2006 14:07:18 GMT

Vala Matt bjó til svakalega góðan súkkulaði-heilsudrykk í þættinum hjá okkur í gær ( sjá hér). Uppskriftina fékk hún frá Eddu Björgvins. Við Sirrý féllum alveg fyrir drykknum sem við köllum Skutluna.

Uppskriftin er hér að neðan, svolítið seinna á ferðinni en við ætluðum og biðjum við ykkur velvirðingar á því, en þeir eru greinilega margir sem vilja smakka á Skutlunni.

Ískalt vatn
Möndlur
Döðlur
Bananar
Jarðaber
Bláber
Kakó
Kókos
Múslí
Granóla
Klakar

...í hlutföllum sem passa ykkar eigin smekk.

Kær kveðja
Heimir Karls.

Neistaflug í Íslandi í bítið í morgun

Mon, 27 Nov 2006 10:31:43 GMT

Sterkasti maður í heimi heitir keppni sem haldin var á dögunum hér á Íslandi og lauk um helgina. Til eru þeir, þar á meðal Hjalti Úrsus Árnason, sem telja að Magnús Ver og aðrir aðstandendur keppninnar, hafi misnotað nafnið “Sterkasti maður í heimi” með það fyrir augum að vekja “falska” athygli á keppninni.

Sjá viðtalið hér!

Það er víst svo, að miður kært er á milli þessara kraftakarla eins og kom vel fram í þættinum í morgun.

Hefurðu skoðun á málinu? Segðu hana hér.

Kveðja
Heimir Karls.

Viljum við kjósa menn eða flokka?

Thu, 23 Nov 2006 10:31:39 GMT

Við Sirrý ræddum í morgun við Pétur Blöndal og Björgvin G. Sigurðsson um pólitík, þar á meðal um það þegar þingmenn ákveða á miðju þingi að segja sig úr flokki sínum. Spurningin sem vaknar við það er oft: Eiga þingmenn þá jafnframt að segja af sér þingmennsku?

Rökin sem mæla með því að þingmenn haldi áfram þingsetu eru þau að stjórnarskráin verndar sæti þeirra, en rökin sem mæla gegn eru etv. spurning um siðferði sem Björgvin G. benti á.

Hvað segir þú? Ef þú kaust í síðustu kosningum kaustu flokk og stefnu hans eða kaustu persónuna?

Eiga þingmenn að segja af sér þingmennsku velji þeir að ganga úr flokki sínum á miðju þingi?

Hvað finnst þér?

Kv
Heimir Karls.

Þyngri dóma fyrir nauðganir?

Mon, 20 Nov 2006 15:00:12 GMT

Oft heyrir maður rætt um að dómar við glæpum á Íslandi séu allt of vægir, sérstaklega hvað varðar kynferðislegt ofbeldi, sér í lagi gagnvart börnum. Að mínum dómi nauðga aðeins aumingjar og mannleysur, sem eðli málsins samkvæmt eru einnig ofbeldis- og glæpamenn.

Getum við karlmenn nokkurn tímann gert okkur í hugarlund hvernig það er að vera kona og vera nauðgað af karlmanni, einum eða fleirum? Ég held ekki! Eigum við þá að dæma og ákveða refsingu í nauðgunarmálum eða eigum við að láta konum það eftir?

En myndi það fækka nauðgunum ef refsing yrði þyngd? Allavega þá væri þessum aumingjum haldið burtu af götunni lengur, og því lengur því betra!

Hvað með þá sem misnota börn, jafnvel kornabörn, kynferðislega? Tekur dómskerfið nógu hart á þeim?

Hvað finnst þér?

Kveðja
Heimir Karls.

Frjálslyndir hver er stefnan í innflytjendamálum?

Fri, 17 Nov 2006 11:50:11 GMT

“Margréti Sverrisdóttur hugnast ekki málflutningur Jóns Magnússonar og segir hann ekki samræmast stefnu Frjálslynda flokksins.” Þetta kemur fram í Fréttablaðinu í dag – viðtalið má lesa hér.

Við töluðum við Jón Magnússon í beinni í Íslandi í bítið í morgun og bárum undir hann þessi orð Margrétar, sem eins og kunnugt er, er framkvæmdastjóri Frjálslynda flokksins. Samtalið við Jón má heyra hér.

En spurningin er: Er Margrét ekki að ráðast að formanni og varaformanni Frjálslynda flokksins í viðtalinu við Fréttablaðið með þeim orðum sem hún lætur falla? Hafa þeir ekki verið að tala sama máli og Jón Magnússon? Hvað finnst þér?

Kveðja

Heimir Karlsson

Heimir Karls

Hvers vegna látum við bjóða okkur allt?

Léttvín í matvörubúðir?

Ættu læknar að fá að auglýsa?

Líkamsræktarsalur fyrir börn!

Er verið að okra á okkur?

Dauðarefsing eða ekki?

Hvernig fannst þér Áramótaskaupið?

Latibær - góður eða slæmur?

Ef þú mættir ráða!

Bílprófsaldur í 18 ár?

Skutlan!

Neistaflug í Íslandi í bítið í morgun

Viljum við kjósa menn eða flokka?

Þyngri dóma fyrir nauðganir?

Frjálslyndir  hver er stefnan í innflytjendamálum?

Frjálslyndir hver er stefnan í innflytjendamálum?